د مالِک خُدائ ثناء صِفت کول
۱د آسمانونو نه د مالِک خُدائ ثناء صِفت وکړئ،
د هغۀ ثناء صِفت په اوچتو آسمانونو کښې وکړئ.
۲د هغۀ ټولو فرښتو د هغۀ ثناء صِفت وکړئ،
ټولو آسمانى مخلوقاتو د هغۀ ثناء صِفت وکړئ.
۳اے نمر او سپوږمۍ د مالِک خُدائ ثناء صِفت وکړئ،
ټولو ځلېدونکو ستورو د هغۀ ثناء صِفت وکړئ.
۴اوچتو آسمانونو د هغۀ ثناء صِفت وکړئ،
په آسمان کښې بره اوبو د هغۀ ثناء صِفت وکړئ.
۵هغوئ ټول دې د مالِک خُدائ د نوم ثناء صِفت وکړى،
ځکه چې د هغۀ په حُکم دوئ پېدا شوى دى.
۶او هغوئ يې د تل دپاره په خپل ځايونو مقرر کړې دى،
او هغۀ ورته قانون مقرر کړو چې هيڅکله نۀ ختميږى.
۷د زمکې نه د مالِک خُدائ ثناء صِفت وکړئ،
اے د لويو سمندرونو مخلوقه او د ټولو سمندرونو لاندې بېخ کښې چې اوسېږئ.
۸برېښنا او ږلۍ، واورو او وريځو،
طوفانى بادونو چې تاسو د هغۀ حُکم منئ.
۹تاسو غرونو او ټولو غونډو،
مېوه دارو ونو او ټولو ديارونو.
۱۰ځنګلى ځناورو او ټولو څاروو،
ښوئېدونکې مخلوقه، او د هوا مارغانو،
۱۱د زمکې بادشاهانو او ټولو قومونو،
تاسو ټولو شهزادګانو او د دُنيا بادشاهانو،
۱۲اے ټولو ځوانانو او پېغلو،
بوډاګانو او ماشومانو.
۱۳ټول دې د مالِک خُدائ د نوم لوئى بيانوى،
ځکه چې صرف د هغۀ نوم لوئ دے،
او د هغۀ شان او شوکت په زمکې آسمانونو باندې دے.
۱۴هغۀ خپل قوم دپاره د فخر ښکر پورته کړے دے،
ترڅو د هغۀ ټول نېک او مقدس خلق د هغۀ ثناء صِفت بيان کړى،
يعنې بنى اِسرائيل چې هغۀ ته نزدې دى.
د مالِک خُدائ ثناء صِفت دې وى.
