د صِلافحاد لوڼه
۱محلاه، نوعاه، حجلاه، مِلکاه او تِرضاه د صِلافحاد لوڼه وې چې هغه زوئ د حِفر، زوئ د جِلعاد، زوئ د مکير، زوئ د منسى، زوئ د يوسف وو. ۲هغوئ لاړې او د موسىٰ، د اِلىعزر اِمام، د مشرانو او د ټول قوم په مخکښې د مالِک خُدائ د حضور د خېمې په خولۀ کښې ودرېدلې او وې وئيل، ۳”زمونږ پلار په صحرا کښې مړ شو، د هغۀ زامن نشته، خو هغه د قورح د قبيلې نه نۀ وو، چا چې د مالِک خُدائ خِلاف بغاوت کړے وو، هغه د خپلې ګناه په وجه مړ شوے وو. ۴چې د هغۀ زامن نشته، نو د هغۀ نوم دې ولې د بنى اِسرائيلو نه ختم شى؟ مونږ له هم لکه زمونږ د پلار د خپلوانو په شان جائيداد راکړئ.“ ۵نو موسىٰ د هغوئ مسئله مالِک خُدائ ته پېش کړه، ۶او مالِک خُدائ هغۀ ته وفرمائيل، ۷”د صِلافحاد لوڼه ټيک وائى، هغوئ له د هغوئ د پلار د خپلوانو په شان جائيداد ورکړه. او د خپل پلار جائيداد دې هغوئ ته مِلاو شى. ۸او تۀ خامخا بنى اِسرائيلو ته ووايه چې د کوم سړى زوئ نۀ وى او مړ شى، نو د هغۀ لور ته به جائيداد په ميراث کښې ملاويږى. ۹کۀ د هغۀ لوڼه نۀ وى، نو ميراث به يې د وروڼو وى. ۱۰کۀ د هغۀ وروڼه نۀ وى، نو ترونه به يې ميراث اخلى. ۱۱کۀ د هغۀ وروڼه يا ترونه هم نۀ وى، نو بيا به د هغۀ نزدې خپلوان د هغۀ ميراث اخلى او دا به د هغوئ د خپل جائيداد په شان وى. اِسرائيليان به دا د قانون په توګه منى، څنګه چې ما، مالِک خُدائ تاسو له حُکم درکړے دے.“
د حضرت يشوَع د بنى اِسرائيلو د مشر په توګه مقرر کېدل
۱۲مالِک خُدائ موسىٰ ته وفرمائيل، ”د عباريم غرونو ته وخېژه او هغه مُلک ته وګوره کوم چې زۀ بنى اِسرائيلو له ورکوم. ۱۳کله چې تۀ هغه وګورې، نو د هارون په شان به تۀ هم مړ شې، ۱۴ځکه چې تاسو دواړو د صين په صحرا کښې زما د حُکم نه بغاوت کړے وو. کله چې ټول قوم زما خِلاف په مريبه کښې وغورېدو، د هغوئ په مخکښې تاسو زما مقدس طاقت څرګند نۀ کړو.“ مريبه په قادِس کښې د صين په صحرا کښې يوه چينه ده. ۱۵موسىٰ مالِک خُدائ ته سوال وکړو، ۱۶”مالِکه خُدايه، تۀ خُدائ پاک يې، هر څيز له ساه ورکوونکے يې، زۀ دا سوال کوم چې يو داسې سړے مقرر کړه چې د دې قوم لار ښودنه کوى ۱۷او په جنګ کښې يې مشرى کوى، نو ستا قوم به د داسې ګډو په شان نۀ وى چې شپون يې نۀ وى.“ ۱۸مالِک خُدائ موسىٰ ته وفرمائيل، ”د نون زوئ يشوَع بوځه ځکه چې هغه قابل سړے دے او خپل لاسونه د هغۀ په سر کېږده چې ستا ذمه وارۍ ورته حواله شى. ۱۹هغه د اِلىعزر اِمام په مخکښې ودروه او د ټول قوم په مخکښې هغۀ له مشرى ورکړه. ۲۰تۀ هغۀ له څۀ خپل اختيارات هم ورکړه، چې ټول اِسرائيليان د هغۀ تابعدارى کوى. ۲۱د فېصلې کولو دپاره به هغه د اِلىعزر اِمام نه مشوره اخلى او اِلىعزر به اُوريم او تميم زما رضا معلومولو دپاره استعمالوى. نو اِلىعزر به د يشوَع او د بنى اِسرائيلو د ټول قوم په هر څيز کښې لار ښودنه کوى.“ ۲۲موسىٰ هم هغه شان وکړل چې څنګه مالِک خُدائ ورته حُکم کړے وو. هغۀ يشوَع، د اِلىعزر اِمام او د ټول قوم په مخکښې ودرولو. ۲۳چې څنګه مالِک خُدائ حُکم کړے وو، موسىٰ خپل لاسونه د يشوَع په سر کېښودل او خپله مشرى يې ورکړه.
