د اورشلیم په صفت کې
(د قورح د طایفې زبور چې سندره هم ده.)
۱څښتن خپل ښار ودان کړ
چې یې بنیاد دی ایښی په سپېڅلو تپو
۲د اسراییلو په ټولو ښارونو کې
د صهیون ښار څښتن ته ګران دی له هره ځایه
۳ای د خدای ښاره
خبرې کیږي ستا د جلال په هکله:
۴«مصریان او بابلیان به وشمېرم
هغو قومونو کې چې پېژني ما
او دغه راز د فلسطین، صور او ایتوپیا خلک
دي دوی ټول د اورشلیم ښاریان»
۵د صهیون په هکله داسې به ویل کیږي:
«هغوی ټول به حق د هغه ښار د تابعیت ولري
خدای تعالی به ټینګ وساتي دا ښار»
۶څښتن به ثبت کړي د قومونو لست
هغوی ټول به کړي حساب
د صهیون په اوسېدونکو کې
۷سندرغاړي او اتڼ کوونکي به دا وایي:
«دی صهیون زما اصلي ځای»
