د مالِک عيسىٰ مسيح په حقله د متى زيرے

اُووم باب

په نورو خلقو الزام لګول

(لوقا ۶:‌۳۷ - ۳۸، ٤۱ - ٤۲)

۱په نورو تهمت مهٔ لګوئ چې په تاسو هم تهمت ونهٔ لګولې شى. ۲ځکه چې څنګه تاسو په نورو تهمتونه لګوئ دغه شان به په تاسو هم تهمتونه ولګولې شى، نو چې څنګه تاسو د بل ناپ تول کوئ، دغه رنګ به ستاسو ناپ تول کولې شى. ۳تاسو د خپل ورور د سترګې خسڼې ته ولې ګوته نيسئ خو په خپله سترګه کښې درته تير نهٔ ښکاريږى؟ ۴او تۀ څنګه خپل ورور ته دا وئيلې شې چې، راشه چې ستا د سترګې نه دا خسڼې وباسم، خو حال دا چې په خپله سترګه کښې درته تير نهٔ ښکاريږى؟ ۵اے رياکاره، اول د خپلې سترګې نه تير وباسه، نو بيا به ستا سترګې وغړيږى چې د خپل ورور د سترګې نه خسڼې وباسې. ۶پاک څيزُونه سپو ته مه ورکوئ، خپلې مرغلرې خنزيرانو ته مه غورزوئ. هغوئ به يې د ښپو لاندې کړى او په تاسو به راوګرځى او ريچې ريچې به مو کړى.

غوښتل، لټول او ټکول

(لوقا ۱۱:‌۹ - ۱۳)

۷وغواړئ نو تاسو ته به درکړې شى، ولټوئ نو تاسو به يې ومومئ، ور وټکوئ نو درته به کولاو کړې شى. ۸ځکه هرڅوک يې چې غواړى، هغهٔ ته ملاويږې، او څوک يې چې لټون کوى، هغه يې مومى، او څوک چې ور ټکوى وى، هغۀ ته کولاويږى. ۹په تاسو کښې داسې څوک شته چې زوئ ترې روټۍ وغواړى او هغه به ورته کاڼې ورکړى؟ ۱۰او يا دا چې ورنه کب وغواړى نو مار به ورکړى؟ ۱۱نو که بيا تاسو چې دومره ګناه ګاران يئ، په دې پوهيږئ چې خپل اولاد ته ښۀ څيزونه ورکړئ، نو ستاسو آسمانى پلار به څومره ښهٔ څيزونه هغه چا ته ورکړى چې څوک يې ترې غواړى. ۱۲د نورو سره تل داسې سلوک کوئ لکه څنګه سلوک چې تاسو د ځان دپاره خوښوئ، دا د شريعت او د ټولو نبيانو د تعليم مجموعه ده.

تنګه دروازه

(لوقا ۱۳:‌۲٤)

۱۳په تنګه دروازه ور داخل شئ ځکه چې د تباهۍ دروازه کولاو ده، لاره يې ښه پلنه ده او ډير په دغه لاره ځى. ۱۴خو کومه دروازه چې د ژوند په لورى ده هغه وړه ده او لاره يې تنګه ده او د دې پېدا کوونکى هم لږ دى.

ونه په ميوه پيژندل

(لوقا ۶:‌٤۳ - ٤٤)

۱۵د دروغژنو نبيانو نه خبردار شئ، داسې کسان چې د ګډو په شکل کښې تاسو ته راځى او په اصل کښې هغه داړونکى شرمخان دى. ۱۶تاسو به هغوئ په خپله ميوه وپيژنئ. ولې د اَزغو جاړو بوټو نه څوک انګور، يا د جاخو نه څوک اينځر راشوکولې شى څۀ؟ ۱۷هم دغه شان ښه ونه ښه ميوه نيسى او د بدې ونې ميوه بده وى. ۱۸ښه ونه بده ميوه نۀ شى نيولې او بده ونه ښه ميوه نهٔ شى نيولې. ۱۹او کومه ونه چې ښه ميوه نهٔ نيسى هغه به پريکړې شى او په اور کښې به وغورزوېې شى. ۲۰ځکه زۀ وايم چې تاسو به هغوئ په خپله ميوه وپيژنئ.

ما تۀ چرې هم نۀ وې پيژندلې

(لوقا ۱۳:‌۲۵ - ۲۷)

۲۱هر هغه څوک چې ما ته مالِک مالِک وائى هغه به د آسمان په بادشاهۍ کښې ورداخل نۀ شى، خو صرف هغه کس چې زما د آسمانى پلار په رضا کار کوى. ۲۲په ورځ د قيامت به ډير ما ته وائى چې مالِکه، مالِکه، مونږ ستا په نوم نبوت نۀ وو کړې څۀ؟ او ستا په نوم مو پيريان نۀ وُو شړلى څۀ؟ او هم ستا په نوم مو ډيرې معجزې نۀ وې ښکاره کړې څۀ؟ ۲۳نو زۀ به هغوئ ته په ښکاره ووايم چې ما تاسو چرې هم نهٔ يئ پيژندلې، تاسو بدکاران زما نه ورک شئ.

دوه قسمه بنيادونه

(لوقا ۶:‌٤۷ - ٤۹)

۲۴هر هغه څوک چې زما دا خبرې اورى او عمل پرې کوى، هغه به د هغه هوښيار کس په شان وګڼلې شى چا چې خپل کور د يو سخت ګټ دپاسه آباد کړې وى. ۲۵او چې باران وشو، سيلاب راغلو، زول او طوفان تير شو او د دۀ کور سره يې ‌‌ډغرې وخوړې، خو دا راپرې نۀ وتو ځکه چې بنيادونه يې د يو سخت ګټ دپاسه وُو. ۲۶خو د هغه چا به بيا څۀ انجام وى چې زما دا خبرې اورى او عمل پرې نۀ کوى؟ د هغۀ مِثال د هغه ناپوهه کس دے چا چې په شګو خپل کور جوړ کړې وو. ۲۷باران ووريدو، سيلاب راغلو، زُول او طوفان تير شو او د دغه کور سره يې ډغرې وخوړې او را وې غورزولو او بلکل يې تباه کړو.“ ۲۸څۀ وخت چې عيسىٰ دا خبرې بس کړې نو خلق د هغۀ په تعليم حق حيران شول. ۲۹ځکه چې هغۀ د هغوئ د شرعې عالمانو په شان نه، خو د اِختيار د مالک په شان يې تعليم ورکولو.