د مالِک عيسىٰ مسيح په حقله د متى زيرے

څلورم باب

د حضرت عيسىٰ آزميښت

۱روح القُدس هغه وخت عيسىٰ بيابان ته بوتلو چې په اِبليس يې وآزمائى. ۲هغۀ څلويښت ورځې او څلويښت شپې روژه ونيوله او په آخر کښې هغه نار نهور شو. ۳بيا اِبليس ورغلو او ورته يې ووئيل، ”که تۀ د خُدائ زوئ يې نو دې کاڼو ته ووايه چې روټۍ شى.“ ۴عيسىٰ جواب ورکړو، ”صحيفې وائى چې، بنى آدم تش په روټۍ نۀ پائى خو هغه په هر هغه خبره پائى چې د خُدائ د خولې نه راوځى.“ ۵بيا اِبليس هغه مقدس ښار ته بوتلو او د خُدائ د کور په مناره يې ودرولو ۶او ورته يې ووئيل چې، ”که تۀ د خُدائ زوئ يې نو خپل ځان دلته نه ښکته وغورزوه، ځکه چې صحيفې وائى چې، هغه به ستا په حقله خپلو فرښتو له حُکم ورکړى، او هغوئ به تا په خپلو لاسونو کښې پورته کړى هسې نه چې په کاڼى تيندک وخورى.“ ۷عيسىٰ جواب ورکړو چې، ”صحيفې دا هم وائى چې، تاسو په خپل مالِک خُدائ آزميښت مه کوئ.“ ۸بيا ابليس هغه د يو ډير اوچت غرهٔ څوکې ته وخيژولو او د دُنيا ټولې بادشاهۍ او د هغې شان او شوکت يې ورښکاره کړل ۹او ورته يې ووئيل چې، ”دا هر څۀ به تا له درکړم خو که تۀ راته صرف سجده او عبادت وکړې.“ ۱۰خو عيسىٰ ورته وفرمائيل چې، ”ورک شه اِبليس. صحيفې وائى چى، تۀ تش مالِک خُدائ ته سجده کوه او صرف هم د هغهٔ عبادت کوه.“ ۱۱نو اِبليس هغه پريښودو او فرښتې راغلې او د هغۀ په خِدمت کښې حاضرې شوې.

د حضرت عيسىٰ په ګليل کښې خِدمت شروع کول

۱۲هر کله چې عيسىٰ واوريدل چې يحيىٰ ګرفتار شوې دے نو هغه ګليل ته واپس راغلو. ۱۳ناصرت يې پريښودو او په کفرنحُوم ښاريې کښې ديره شو چې د درياب په غاړه دے چې د زبولون او نفتالى په سرحد دے. ۱۴دا د يشعيا نبى خبرې پوره کول وُو يعنې، ۱۵”د زبولون او د نفتالى علاقه، د درياب طرف ته د اُردن نه په خوا کښې، د غير قومونو ګليل. ۱۶کوم خلق چې په تيارۀ کښې ناست وُو، هغوئ يوه لويه رڼا وليدله، او څوک چې په زمکه د مرګ په سورى کښې ناست وُو، پرې رڼا وځليدله.“ ۱۷د هغې ورځې نه عيسىٰ دا بيان شروع کړو چې، ”توبه ګار شئ ځکه چې د خُدائ بادشاهى ستاسو مينځ ته راغلى ده.“

څلورو ماهى ګيرو ته د حضرت عيسىٰ دعوت

۱۸عيسىٰ د ګليل درياب په غاړه ګرځيدو چې دوه وروڼه يې وليدل، يو شمعون چې د پطروس په نوم ياديږى او د هغۀ ورور اندرياس. هغوئ په درياب کښې جال اچولو ځکه چې هغوئ ماهى ګير وُو. ۱۹عيسىٰ ورته وفرمائيل چې، ”ما پسې راځئ او زۀ به تاسو آدم ګير جوړ کړم.“ ۲۰هغوئ سمدستى خپل جالونه پريښودل او په هغۀ پسې روان شول. ۲۱کله چې عيسىٰ د دې ځائ نه په وړاندې لاړو نو دوه وروڼه يې وليدل، يعقوب د زبدى زوئ او د هغۀ ورور يوحنا چې په کشتئ کښې يې د خپل پلار زبدى سره جالونه مرمت کول. هغوئ يې راوبلل. ۲۲هغوئ سمدستى کشتئ او خپل پلار پريښودل او په هغۀ پسې روان شول.

د حضرت عيسىٰ تعليم، بيان او بيماران جوړول

۲۳عيسىٰ په ټول ګليل کښې ګرځيدو، د يهُوديانو په عبادت خانو کښې يې تعليم ورکولو او د خُدائ د بادشاهۍ د زيرى بيان يې کولو او د خلقو هر رنځ او بيمارې يې روغوله. ۲۴د هغۀ آوازه په ټول شام کښې خوره شوه او د هر رنځ بيماران چې په عذاب آخته وُو، يعنې هغوئ چې پيريانو نيولى وُو، ميرګو نيولى او شل يې ورله راوستل نو هغۀ روغ کړل. ۲۵ډير خلق ورپسې روان شول چې د ګليل، د دِکپولس، د يروشلم، د يهوديه او د اُردن د پورې غاړې اوسيدونکى وُو.