د مالِک عيسىٰ مسيح په حقله د متى زيرے

اَتۀ ويشتم باب

د حضرت عيسىٰ بيا ژوندى کيدل

(مرقوس ۱۶:‌۱ - ۱۰، لوقا ۲٤:‌۱ - ۱۲، يوحنا ۲۰:‌۱ - ۱۰)

۱د سبت ورځ تيره شوه او د اِتوار د ورځې سحر کيدونکے وو چې مريم مګدلينى او هغه بله مريم د قبر ليدو ته راغلې. ۲ناګهانه يوه سخته زلزله راغله، د آسمان نه د رب يوه فرښته راکوزه شوه، غار له راغله او هغه کاڼې يې ورغړولو او پرې کښيناسته. ۳مخ يې د بريښنا په شان ځليدو او جامې يې لکه د واورو په شان سپينې وې. ۴څوکيداران يې په ليدو د ويرې نه په لړزيدو شول او لکه د مړو پريوتل. ۵فرښتې بيا ښځو ته وفرمائيل چې ”مهٔ يريږئ، ما ته پته ده چې تاسو د عيسىٰ ليدو له راغلى يئ څوک چې په سولۍ شوې وو. ۶هغه دلته نشته، هغه بيا پورته کړې شوې دے لکه څنګه چې هغۀ فرمائيلى وُو. راشئ، هغه ځائ وګورئ چرته چې هغه پروت وو. ۷نو بيا زر لاړې شئ او د هغۀ مريدان خبر کړئ چې هغه له مړو نه ژوندے پاڅولے شوے دے او ستاسو نه وړاندې ګليل ته روان دے، تاسو به يې هلته ووينئ. څهٔ چې درته ما ووئيل هغه ياد ساتئ.“ ۸هغوئ د قبر نه په هيبت او خوشحالۍ لاړې او په دؤ شوې چې مريدان خبر کړى. ۹ناڅاپى عيسىٰ په لاره پرې پيښ شو او په هغوئ يې سلام واچولو. هغوئ ورغلې او د هغۀ پښې يې ونيولې او سجده يې ورته وکړله. ۱۰بيا عيسىٰ هغوئ ته وفرمائيل چې ”يريږئ مه، لاړې شئ او زما وروڼو ته دا پېغام ورکړئ چې هغوئ دې ګليل ته لاړ شى، ما به هلته ووينى.“

د څوکيدارانو خبر راوړل

۱۱ښځې لا په خپله لار تللې چې ځينې څوکيداران ښار ته ننوتل او مشرانو اِمامانو ته يې ټوله قيصه تيره کړه. ۱۲بيا هغوئ مشران راغونډ کړل او صلاح يې وکړه. او مشرانو اِمامانو سپاهيانو ته غټ رشوت ورکړو. ۱۳او ورته يې ووئيل چې ”تاسو به دا ووايئ چې د شپې چې مونږ اودۀ شو نو د هغۀ مريدان راغلل او د هغۀ لاش يې پټ کړو.“ ۱۴او ورسره يې دا هم ووئيل چې، ”که دا خبر د ګورنر غوږو ته ورسيدو نو مونږ به د هغۀ سره خبره وکړو او تاسو ته به هيڅ نقصان نۀ درکوى.“ ۱۵نو هغوئ پيسې واخستلې او څۀ چې ورته وئيلے شوى وُو هم هغه شان يې وکړل. دغه قيصه تر نن ورځې په يهُوديانو کښې خوره ده.

مريدانو ته حُکم ورکول

(مرقوس ۱۶:‌۱٤ - ۱۸، لوقا ۲٤:‌۳۶ - ٤۹، يوحنا ۲۰:‌۱۹ - ۲۳، اَعمال د رسولانو ۱:‌۶ - ۸)

۱۶يوولس مريدان د ګليل هغه غر ته روان شول د کوم چې عيسىٰ ورته د تللو دپاره فرمائيلى وو. ۱۷کله چې هغوئ هغه وليدو نو ورته په سجده شول خو ځينې شکمن وُو. ۱۸بيا عيسىٰ ورغلو او ورته يې وفرمائيل چې ”د آسمان او د زمکې ټول اختيار ما ته راکړې شوے دے. ۱۹ځکه تاسو په زمکه خوارۀ شئ او ټول قومونه زما مريدان کړئ او د پلار، د زوئ او د روحُ القُدس په نامه ورته بپتسمه ورکړئ. ۲۰او دا تعليم ورکوئ چې په هغه ټولو خبرو عمل کوئ چې ما تاسو ته حکم کړې دے. او دا يقين ساتئ چې زۀ به تل او د قيامته پورې تاسو سره يم.“