د مالِک عيسىٰ مسيح په حقله د متى زيرے

شپاړسم باب

د نښو غوښتل

(مرقوس ۸:‌۱۱ - ۱۳، لوقا ۱۲:‌۵٤ - ۵۶)

۱فريسيان او صدوقيان عيسىٰ ته راغلل او د آزميښت په توګه يې ورته وفرمائيل چې ”مونږ ته يوه آسمانى معجزه وښايه“ ۲هغۀ جواب ورکړو چې ”تاسو په ماښام کښې وايئ چې موسم به ښۀ شى ځکه چې آسمان سور دے، ۳او د سحر په وخت وايئ چې نن به سيلۍ راشى ځکه چې آسمان سور او دوند دے. تاسو د آسمان د مخ تعبير کولې شئ خو زمانو په نښو نهٔ پوهيږئ. ۴دا يوه بدکاره او زناکاره پيړۍ ده چې نښې غواړى خو د يونس نبى د نښې نه سوا يوه نښه به هم دوئ ته ورنهٔ کړې شى.“ نو بيا هغه ترې روان شو او هغوئ يې پريښودل.

د فريسيانو او صدوقيانو خمبيره

(مرقوس ۸:‌۱٤ - ۲۱)

۵خو کله چې هغوئ بلې غاړې ته واوړيدل نو بيا مريدانو ته دا پته ولګيده چې روټۍ ورنه د ياده وتلى ده. ۶عيسىٰ هغوئ ته وفرمائيل چې ”د فريسيانو او د صدوقيانو د خمبيرې نه ځان ساتئ.“ ۷هغوئ په خپلو کښې يو بل ته ووئيل چې ”دا ځکه چې مونږ روټۍ نۀ ده راوړې.“ ۸عيسىٰ په دې خبر شو چې هغوئ د څهٔ په حقله خبرې کوى، نو د هغوئ نه يې تپوس وکړو، ”اے بې ايمانه خلقو، دا تاسو داسې خبرې ولې کوئ چې ګنى روټۍ درسره نِشته؟ ۹تاسو لا تر اوسه نهٔ پوهيږئ؟ ولې تاسو ته هغه پينځۀ روټۍ د پينځۀ زره کسانو دپاره يادى نۀ دى، او تاسو څومره ټوکرۍ ترې اوچتې کړې وې؟ ۱۰بيا هغه اووۀ روټۍ د څلورو زرو کسانو دپاره، او څومره غټى ټوکرۍ تاسو ته پاتې شوې وې؟ ۱۱تاسو څنګه په دې خبره پوهه نۀ شوئ چې ما خو د روټۍ ذکر نۀ کولو؟ ما درته فرمائيلى وُو چې د فريسيانو او صدوقيانو د خمبيرې نه به ځان ساتئ.“ ۱۲بيا هغوئ په دې مطلب پوهه شول چې د روټۍ او د خمبيرې نه ځان ساتل نهٔ دى، خو د فريسيانو او صدوقيانو د تعليم نه ځان ساتل دى.

د حضرت عيسىٰ په حقله د پطروس اِقرار

(مرقوس ۸:‌۲۷ - ۳۰، لوقا ۹:‌۱۸ - ۲۱)

۱۳خو کله چې هغوئ د قيصريه فيليپۍ علاقې ته راغلل نو عيسىٰ د خپلو مريدانو نه تپوس وکړو چې ”خلق څۀ وائى چې اِبن آدم څوک دے؟“ ۱۴هغوئ جواب ورکړو، ”ځينې وائى چې بپتسمه ورکوونکې يحيىٰ دے، څه دې الياس ګڼى، او څهٔ نور دې اوس هم يرمياه يا د نبيانو نه يو ګڼى.“ ۱۵هغۀ ورته وفرمائيل چې ”تاسو څۀ وايئ، چې زۀ څوک يم؟“ ۱۶شمعون پطروس جواب ورکړو، ”تۀ مسيح د ژوندى خُدائ زوئ يې.“ ۱۷بيا عيسىٰ وفرمائيل، ”اَے د يوحنا زويه شمعونه، تۀ بې شکه بختور يې. تا دا خبره د فانى انسان نه نۀ ده زده کړې بلکې زما آسمانى پلار دا ستا په زړۀ کښې اچولې ده. ۱۸خو زۀ تا ته دا وايم چې تۀ پطروس يې، چې معنىٰ يې ګټ دے، چې زۀ به خپل جماعت په دې ګټ آبادوم، او په دې به مرګ هم هيڅ کله غالبيدې نۀ شى. ۱۹زۀ به تا له د آسمان د بادشاهۍ چابيانې درکړم، تهٔ چې په زمکه څۀ منع کړې هغه به په آسمان کښې هم منع شى، او څۀ چې تۀ په زمکه روا کړې هغه به په آسمان کښې هم روا شى.“ ۲۰بيا هغۀ مريدان په سختۍ سره منع کړل چې ”هيچا ته مه وايئ چې هغه مسيح دے.“

د حضرت عيسىٰ د مرګ او د بيا ژوندى کيدو په حقله پېشګوئې

(مرقوس ۸:‌۳۱ - ۹:‌۱، لوقا ۹:‌۲۲ - ۲۷)

۲۱د هغه وخت نه عيسىٰ خپلو مريدانو ته دا خبره څرګنده کړه چې ”هغه به ضرور يروشلم ته لاړ شى او د مشرانو او د مشرانو اِمامانو او د شرعې د عالمانو د لاسه به ډيرې سختۍ وزغمى، او هغه به ووژلې شى او په دريمه ورځ به بيا راژوندې شى.“ ۲۲بيا پطروس هغه د لاس نه ونيوو او يوې خوا ته يې ورته ووئيل چې ”خُدائ دې نۀ کړى مالِکه، په تا دې داسې هيڅ کله هم ونۀ شى.“ ۲۳بيا عيسىٰ مخ ورواړوو او پطروس ته يې وفرمائيل، ”رانه لرې شه شيطانه، تۀ زما د لارې خنډ يې، تۀ د بنى آدمو په شان سوچ کوې، نه چې د خُدائ په شان.“ ۲۴بيا عيسىٰ خپلو مريدانو ته وفرمائيل چې ”که څوک زما مريد جوړيدل غواړى، هغه دې د خپل ځان نه منکر شى، خپله سولۍ دې راواخلى او ما پسې دې راځى. ۲۵څوک چې ځان ساتى هغه به يې بائيلى، خو څوک چې زما د خاطره خپل ژوند بائيلى، هغه به يې حاصل کړى. ۲۶که څوک د خپل ابدى ژوند په بدله کښې ټوله دُنيا ومومى نو هغهٔ ځان ته څهٔ فايده ورکړه؟ او د خپل ژوند په بدله کښې هغه څهٔ ورکولې شى؟ ۲۷ځکه چې اِبن آدم به د خپل پلار په لويئ کښې د خپلو فرښتو سره راځى او بيا به هغه هر چا ته د خپل عمل بدله ورکوى. ۲۸زۀ تاسو ته دا وايم چې دلته ځينې داسې کسان ولاړ دى چې تر هغې به نۀ مرى ترڅو چې هغوئ اِبن آدم خپلې بادشاهۍ ته په راتلو ونهٔ وينى.“