د مالِک عيسىٰ مسيح په حقله د متى زيرے

شپږم باب

د خيرات په حقله تعليم

۱خبردار چې د خپلې پرهيزګارۍ ښودنه د خلقو په مخکښې ونۀ کړئ. که تاسو داسې وکړئ نو ستاسو د آسمانى پلار سره هيڅ اَجر نشته. ۲هر کله چې تاسو څۀ خيرات کوئ نو ډنډوره کوئ يې مه، لکه څنګه چې يې رياکاران په عبادت خانو او کوڅو کښې کوى چې خلق يې صِفت وکړى. زۀ تاسو ته دا وايم چې هغوئ ته اَجر پوره مِلاو شوے دے. ۳خو تاسو چې کله هم خيرات کوئ نو په داسې شان چې ګس لاس مو په دې خبر نۀ شى چې ستاسو ښې لاس څۀ کوى. ۴ستاسو خيرات دې ضرور په پړده کښې وى نو ستاسو آسمانى پلار چې دا هر څۀ وينى چې تاسو يې په پړده کښې کوئ، هغه به د دې بدل درکړى.

د دعا په حقله تعليم

(لوقا ۱۱:‌۲ - ٤)

۵بيا دا چې تاسو کله هم دعا کوئ نو د رياکارانو په شان مه جوړيږئ. هغوئ دا ډير خوښوى چې په عبادت خانو او چوکونو کښې د دعا دپاره ودريږى چې هر څوک يې ووينى. زۀ تاسو ته دا وايم چې هغوئ ته خپل اَجر پوره ملاو شو. ۶خو کله چې تاسو دعا کوئ نو خپلې کوټې ته ننوزئ، ور پورې کړئ او خپل پلار ته په زارو شئ، څوک چې د پړدې په دغه ځائ کښې موجود دے. او ستاسو آسمانى پلار څوک چې پټ رازونه وينى، هغه به بدل درکړى. ۷او کله چې تاسو دعا کوئ نو په دعا کښې د بې دينه قومونو په شان د بې مطلبه خبرو تکرار مه کوئ، د چا چې دا خيال وى چې د ډيرو وئيلو په وجه به د هغوئ واوريدې شى. ۸د هغوئ پيښې مه کوئ، ستاسو آسمانى پلار ستاسو د غوښتو نه وړاندې ستاسو په حاجتونو خبر دے. ۹نو داسې دعا کوئ، اَے په آسمان کښې زمونږ پلاره، ستا نوم دې پاک وى. ۱۰ستا بادشاهى دې راشى. ستا مرضى دې په زمکه هم پوره شى څنګه چې په آسمان کښې پوره کيږى. ۱۱مونږ ته خپل روزمره رزق راکړه، ۱۲او زمونږ ګناهونه معاف کړه، څنکه چې مونږ خپل قصور وار معاف کوو. ۱۳او مونږ په آزميښت کښې مه اچوه، خو مونږ د بدۍ نه بچ کړه. ۱۴ځکه که تاسو د نورو ګناه معاف کړئ، نو ستاسو آسمانى پلار به هم تاسو معاف کړى. ۱۵خو که تاسو نور نۀ معاف کوئ نو ستاسو آسمانى پلار به هم ستاسو ګناهونه معاف نهٔ کړى.

د روژې په حقله تعليم

۱۶هر کله چې تاسو روژه نيسئ نو د رياکارانو په شان ځانونه خفه مه ښکاره کوئ. هغوئ خپل مخونه ځکه ورانوى چې خلق ووائى چې ګنى د دوئ روژه ده. زۀ تاسو ته دا وايم چې هغوئ ته خپل اَجر پوره مِلاو شوې دے. ۱۷خو هر کله چې روژه نيسئ نو خپل سر غوړوئ او مخ وينځئ، ۱۸د دې دپاره چې څوک دا ونۀ وائى چې ګنى ستا روژه ده، خو تش ستا آسمانى پلار څوک چې په پړده کښې دے. او ستا آسمانى پلار چې په رازونو خبر دے، هغه به تا ته ستا اَجر درکړى.

د آسمان خزانې

(لوقا ۱۲:‌۳۳ - ۳٤)

۱۹په زمکه ځان ته خزانې مه جمع کوئ چرته چې هغه وينهٔ وهى او زنګ کيږى او غلۀ ورپسې کنډر کوى او پټوى يې. ۲۰خو خپل ځان ته خزانې په آسمان کښې جمع کوئ چرته چې نه وينۀ شته او نه زنګ چې دا خرابې کړى، چرته چې نه غل شته او نه وينهٔ. ۲۱ځکه چې چرته ستا خزانه وى هلته به ستا زړۀ هم وى.

د وجود رڼا

(لوقا ۱۱:‌۳٤ - ۳۶)

۲۲سترګې د بدن دپاره ډيوې دى. که ستا سترګې روغې وى نو ستا ټول بدن به رڼا وى. ۲۳خو که سترګې دې خرابې وى نو ستا ټول بدن به په توره تيارهٔ کښې وى. او که چرې کومه رڼا چې په تا کښې ده، که هغه هم تيارۀ ده نو بيا دا څومره لوئ تورتم دے.

د خُدائ مال

(لوقا ۱۶:‌۱۳، ۱۲:‌۲۲ - ۳۱)

۲۴يو غلام هم د دوؤ مالِکانو خِدمت نۀ شى کولې. ځکه چې يا خو به هغه د يو نه نفرت کوى او د بل سره مينه، او يا به هغه د يو وفادار وى او د بل نه به کرکه کوى. تاسو د خُدائ او د مال دولت دواړو يو ځائ خِدمت نهٔ شئ کولې. ۲۵ځکه زۀ تاسو ته دا وايم چې د خپل ژوندون دپاره دا انديښنه مه کوئ چې څۀ به وخورو څهٔ به وڅښو، او يا څۀ به آغوندو. ولې ژوندون د روټۍ، او بدن د جامو نه ډير غوره نهٔ دے څۀ؟ ۲۶د هوا مارغانو ته وګورئ، دوئ نۀ خو کرى او نۀ ريبى او نۀ يې خمبو کښې جمع کوى خو بيا هم ستا آسمانى پلار هغوئ له رزق ورکوى. نو بيا تاسو هغهٔ ته د هغوئ نه ډير اهم نهٔ يې څهٔ؟ ۲۷په تاسو کښې داسې څوک شته چې هغه په انديښنو خپل ژوند يو ساعت قدرې زيات کړى؟ ۲۸د جامو انديښنې بيا د څۀ دپاره؟ په پټو کښې ځنګلى ګلونو ته خو لږ خيال وکړئ، چې هغه څنګه راټوکيږى، نه خو هغوئ خوارى کوى او نه ځان دپاره جامې جوړوى. ۲۹خو زۀ تاسو ته دا وايم چې سليمان چرې هم سره د خپل ټول شان او شوکت د دې ګلونو په شان ښائسته جامې اچولې نهٔ وې. ۳۰خو که چرې خُدائ د پټو واښو ته دا شان جامې ورکوى، کوم چې نن شته او سبا په تنور کښې غورزولې شى. نو ولې هغه به بيا تاسو ته ښکلې جامې در نهٔ کړى څهٔ؟ اے د کم ايمان خاوندانو. ۳۱نو دا انديښنه مه کوئ چې څۀ به وخورو، څۀ به وڅښُو يا څۀ به واغوندو. ۳۲په دې ټولو څيزونو پسې د دُنيا نور قومونه په منډه دى. ځکه چې ستاسو آسمانى پلار د مخکښې نه ستاسو د حاجتُونو نه ښهٔ خبر دے. ۳۳خو تاسو د هر څۀ نه اول د خُدائ د بادشاهۍ او د هغۀ د رښتينوالۍ په لټون کښې شئ، نو بيا به هغه ستاسو ټول حاجتونه پوره کړى. ۳۴ځکه د سبا غم مه کوئ، سبا به خپل غم په خپله کوى. د نن دپاره نننې غم کافى دے.